CEBU, Philippines - Nagkaguliyang ang mga tinun-an sa Don Vicente Rama Memorial National High School human giingong 28 nila ka mga Girl Scouts nga gikan pa sa ilang camping sa Camp Marina sa barangay Kalunasan niadtong Sabado ang giingong nabuyagan og dautang espiritu.
Ang mga tinun-an gidala sa barangay hall sa barangay Basak aron susihon sa mga barangay health workers gumikan sa giingong dili mahimutang ug nag-alindasay nilang gipamati.
Matud pa nga dunay gikahadlokan ang mga tinun-an human sa ilang pag-camping sa maong bukid. Usa sa mga tinun-an nga katorse anyos ang nangangkong nakakita og dili ingon nato nga nagpuyo sa usa ka dakong punoan sa kaymito sa maong lugar.
Si Basak Barangay kapitan Dave Tumulak mitug-an sa mga tigbalita nga ang maong mga tinun-an na-stress lang gumikan sa kakulang sa katulog tungod sa ilang jamboree, gani dihang gisusi sa mga medical team sa ilang barangay walay timailhang nagkasakit kanila. Matud pang Tumulak ang mga tinun-an nangangkong duna silay nakit-ang usa ka lalaki nga itom kaayo og mata, usa ka babaye ug duna say bata nga misunod kanila sa ilang pag-uli gikan sa Camp Marina.
Niadtong Domingo sumala pa sa News5 unom ka mga tinun-an ang giingong nakasinati og grabeng kalisang ug nadungagan kini kagahapon og laing unom sa ilang pag-abot diha sa ilang tunghaan gikan sa camping.
Nunot sa kahadlok sa mga bata ug mga magtutudlo nagdungan sila pag-ampo diha sa tunghaan aron panalipdan gikan sa dautang espiritu.
Gihulagway hinuon ni Tumulak nga mass hysteria lang ang nahitabo ug mahimo ra kining mahupay human sa duha ka adlaw nga pahuway, hinuon gipailawom sa stress debriefing ang mga bata aron pagsigurong luwas ang ilang kahimtang.
Samtang matud pang Tumulak bisan si Father Henry Visitacion ang ilang kura paroko nga mitan-aw sa mga bata miingon nga dili ‘possession’ sa dautang espiritu ang iyang nakita. (BANAT NEWS)