CEBU, Philippines - Walay nahimo ang usa ka bana pagpugong sa usa ka mamumuno nga midul-it pagpusil sa iyang asawa diha mismo sa iyang atubangan samtang ang biktima nanglaba kagahapon sa udto diha sa barangay Tupas, sa lungsod sa Pinamungajan.
Giila sa kapolisan ang biktima nga mao si Felicidad Yamyamin, kinsa nakaangkon og samad pinusilan sa tangkugo gikan sa wala pa matinong kalibre sa armas nga gigamit sa mamumuno.
Gisuwayan unta pagdala sa Carcar Provincial Hospital sa banang si Leonardo si Felicidad apan gideklarar kining patay na.
Si Leonardo mibutyag sa Banat News nga diha ra siya sa luyong bahin sa iyang asawa dihang nahitabo ang pagpamusil.
“Diha gyud ko. Ako untang daganon pero nakapusil na sa iyang luyo,” matud pang Leonardo sa pakighinabi kaniya pinaagi sa telepono.
Wala makaila si Leonardo sa pamayhon sa mamumuno apan nakabantay siyang gikatabi na kini sa ilang silingang ginganlan og Antonio sa wala pa mahitabo ang krimen.
Nagduda ang bana nga personal nga bangi ang motibo sa pagpatay sa iyang asawa sanglit nakaaway sa biktima si Antonio pipila na ka adlaw ang milabay.
“Gibadlong man gud na sa akong asawa nga dili ipatugway ang kanding duol sa maisan kay kan-on…nasuko man na siya unya nanghudlat nga hapakon mi’g hand grenade,” matud pang Leonardo.
Ang kapolisan padayon pang nagpahigayon og imbestigasyon sa maong kaso ug gikatakdang imbitahon si Antonio kabahin sa maong hitabo. (BANAT NEWS)