Liza, nakiisa sa UN assembly!

Dumalo si Liza Soberano sa Voices That Move event sa 2026 Goals Lounge, na ginanap sa 81st United Nations General Assembly sa New York City.

Very inspiring ang naging pag-uusap nila nina Pritika Swarup at Muhammad Lila: “Honored to have been part of the 81st @unitednations general assembly.

“Moments like this remind me of the importance of listening, learning from one another, and using the platforms we have to contribute to something bigger than ourselves,” caption niya.

Nagpasalamat din ang aktres sa pagkakataong maibahagi ang pananaw sa advocacy, representation at responsibilidad ng pagkakaroon ng boses.

Ayon sa unpartnerships.un.org, tinalakay sa event ang women’s empowerment, representation, advocacy at paggamit ng platform para sa makabuluhang pagbabago.

Kamakailan, gumanap bilang voice actress si Liza sa DreamWorks film na Forgotten Island.

Abi Marquez, natupad ang pangarap sa Masterchef Asia

Natupad ang childhood dream ni Filipino content creator Abi Marquez matapos maging guest judge sa MasterChef Asia.

Sa Instagram, ibinahagi ni Abi ang photos mula sa show kasama ang judges na sina Chefs Edward Kyun Lee, Kelvin Cheung at Pam Pichaya Soontornyanakij.

“Still can’t believe it!!!!!! I had the chance to step into a kitchen I’ve dreamed about since I was a kid,” caption niya sa post noong Oct. 13.

Sa teaser ng TLC Southeast Asia, ipinakilalang guest judge si Abi sa ika-apat na episode kung saan kailangang gawing dessert ang anim na iconic Asian drinks. “The most important thing that I’m looking for is to be able to see and taste the essence of that drink in that dessert,” sey Abi.

Nag-premiere ang bagong season ng MasterChef Asia noong Sept. 22 at may 10 episodes.

Ang Filipino chef na contestant sa MasterChef Asia ay si Ivory Yat Vaksman na nag-3rd place sa MasterChef Pinoy Edition noong 2012.

Hollywood actress, iniimbestigahan ng FBI sa pagwawala sa eroplano

Inakusahan ang Hollywood actress na si Selma Blair na gumawa ng malaking gulo sa Delta flight mula L.A. papuntang NYC noong nakaraang Oct. 11.

Ayon sa report ng TMZ, inaresto si Blair matapos umanong tangkaing buksan ang pinto ng eroplano habang ito’y nasa ere pa.

Marahas din umano siya sa flight attendants — sinuntok ang isa at kinagat ang isa pa.

Sa dispatch audio na nakuha ng TMZ, humingi ng medical personnel sa gate dahil sa duguang ilong at kagat, at dinala sa ospital ang isang flight attendant.

Nabanggit din sa audio na may pasaherong nauntog ang ulo sa bulkhead.

Paglapag, inaresto si Selma at isinugod sa ospital. Kumalat din ang audio kung saan sumisigaw umano siya habang ibinababa ng eroplano.

Ayon sa TMZ, sinipa pa ni Blair sa ulo ang isang Port Authority police officer sa ambulansya, at sinaktan din ang isang nurse sa ospital na nagsampa ng kaso. Kinasuhan siya ng dalawang counts ng assault.

Pahayag ng rep ng aktres: “Selma experienced a medical emergency that led to the alleged conduct. Upon landing, she received immediate medical attention and is currently in stable condition.”

Iniimbestigahan na ng FBI ang insidente. Naglabas naman ng pahayag ang Delta: “Delta has zero tolerance for unruly or unlawful behavior, as the safety of our customers and crew always comes first.”

Noong 2018, na-diagnose si Selma with multiple sclerosis.

Nakilala si Selma sa mga pelikulang Cruel Intentions, Legally Blonde, The Sweetest Thing, Hellboy, A Guy Thing, The Fog, Down To You, The Alibi and A Dirty Shame.