Bomb threat sa Cebu IT Park

CEBU, Philippines — Gipalibotan ug gipailalom sa partial lockdown ang usa ka mall sa Cebu IT Park sa Barangay Apas, sa Cebu City  kagahapon, Biyernes sa hapon, Hulyo 3, human makadawat ang establisamento og bomb threat  nga gitanom sulod sa maong establisemento.

Ikaduha na kini nahitabo karong semanaha sa Cebu City human ang pagpanghulga sab nga nadawat sa us aka pribadong eskuylahan diha sa downtown area sa siyudad niadtong adlaw nga Huwebes.

Sa impormasyon gikan sa tsirman sa Cebu City Disaster Risk Reduction and Management Council nga si Konsehal Dave Tumulak, nadawat ang bomb threat sa alas 3:40 sa hapon pinaagi sa usa sa ka mensahe ngadto sa Facebook page sa mall kun diin nihulga nga adunay gipahimutang nga improvised explosive device (IED) o timer bomb sulod sa banyo sa ikaduhang andana sa mall.

 Nagpabarug dayun og Incident Management Team (IMT) ug command post sa Garden Bloc samtang nag-inspeksyon ang mga bomb experts sa Philippine National Police (PNP).

Si Mayor Nestor Archival namahayag nga gipaabot nga mahuman ang inpeskyon alas 8:30 kagabii ug hangtud ning pagsulat sa balita, walay napalgang bomba sa mall, apan giawhag niya ang katawhan nga magpabiling kalma.—  IBM  BANAT NEWS