Mandaue nilibkas na sa four-day workweek
CEBU, Philippines — Opisyal nang gitapos ang skeletal workforce arrangement sa Mandaue City Hall human gibakwi ni Mayor Thadeo Jovito “Jonkie” Ouano ang polisiya sa upat ka adlaw nga workweek kagahapon.
Matud ni Ouano, mas convenient alang sa mga lumulupyo ang pagbalik sa regular nga lima ka adlaw nga trabaho tungod kay mas sayon alang kanila ang pag-avail sa serbisyo sa kagamhanan sa siyudad.
Si Ouano nagkanayon nga niarang-arang na ang presyo sa lana hinungdan nga mas maayo nang mobalik ang city government sa normal nga operasyon.
Matud ni Ouano nga base sa feedback nga iyang nadawat mas convenient ang lima ka adlaw nga trabaho kompara sa upat ka adlaw ilabina alang sa transacting public.
Apan bisan pa sa pagbalik sa regular nga workweek matud usab sa mayor nga padayon gihapon ang city government sa pagpatuman sa conservation ug energy-saving initiatives.
Lakip niini, ang pagpamenos sa konsumo sa fuel sa mga sakyanan sa gobiyerno ug pagsiguro nga mapalong ang mga suga ug air-conditioning units sa mga opisina sa city hall kon walay tawo. Si Ouano nagkanayon nga nangayo siya og datos gikan sa City Administrator’s Office aron makita ang kalainan sa natipig nga gasto tali sa four-day ug five-day workweek arrangement.
Si City Administrator Gonzalo “Sally” Malig-on, Jr. nagkanayon nga padayon pa nilang gi-consilidate ang mga report gikan sa department heads mahitungod sa kalainan sa gasto tali sa upat ug lima ka adlaw nga trabaho.
Apan matud ni Malig-on bisan dako man o gamay ang matipig nga pundo mas giuna sa city government ang pagserbisyo sa publiko ug ang pagsiguro nga adunay tawo sa mga opisina aron normal ang operasyon.
Niadtong Abril 17, 2026 gipatuman sa Mandaue City Government ang four-day workweek tungod sa padayon nga pagsaka sa presyo sa lana gumikan sa tensiyon sa Middle East.
Ubos sa maong arrangement ang mga adlaw nga Biyernes gihimong work-from-home days. BDB BANAT NEWS
- Latest
