CLAYGO hingusgan sa pagpatuman

CEBU, Philippines — Ubos sa paningkamot sa pagpalambo sa responsibilidad sa kinaiyahan ug kalimpiyo sa publiko, ang konseho sa Dakbayan sa Sugbo nipalabang og resolusyon alang sa pagpalig-on sa pagpatuman sa "Clean As You Go" (CLAYGO) nga palisiya sa tanang pampublikong parke, plaza, ug food court nga gimentinar sa kagamhanan sa siyudad.

Gihingusgan ang maong resolusyon ni Konsehal Nyza "Nice" Archival aron nga ipatuman sa sakop sa Department of Public Services (DPS), Parks and Playgrounds Commission ug sa Market Operations Division ang mas istrikto nga mga lakang sa pagsiguro sa epektibong pagpatuman sa City Ordinance No. 2907 kun “CLAYGO” ordinance.

Subay sa City Ordinance No. 2907, nag-institutionalize kini sa palisiya sa CLAYGO nga nagmando sa mga indibidwal sa pagpanghinlo sa ilang kaugalingon ug paglabay sa basura sa hustong paagi human mogamit sa mga komunal nga mga lugar.

Samtang ang ordinansa gipatuman na sa dugay nga panahon namatikdan nga dili husto ang paglabay sa basura ug pabilin nga nagkatag sa mga pampublikong lugar tungod sa huyang nga pagpatuman ug kakulang sa kahibalo sa publiko nga niresulta sa hugaw ang palibot og dugang trabaho sa mga sanitary personnel.

Mao nga gihimug-atan ni Archival nga hugtanon nga ipatuman ang maong ordinansa pinaagi sa pagbutang og mga CLAYGO signage aron nga mapahinumduman ang kinabag-an ug madisiplina ang mga tawo human mogamit sa pampublikong lugar ilabi na sa mga kan-anan, mga parke ug pasilidad nga gipadagan sa kagamhanan.

Gikataho nga ang mga kawani nga nakadestino sa mga pampublikong lugar kinahanglan nga moawhag sa mga bisita ug mga lokal nga mosunod sa palisiya.

Giawhag usab ang mga barangay ug pribadong nagdumala og mga establisamento sa pagsunod sa palisiya alang sa pagsuporta sa mas lapad nga kampaniya sa kalimpiyo sa siyudad. Ang maong lakang nagtimaan kini alang sa mas hugtanon nga pagduso ngadto sa malungtarong kalimpiyo sa publiko ug disiplina sa matag indibidwal subay sa mandato sa siyudad ubos sa Local Government Code of 1991. —/BDB (BANAT NEWS)