MANILA, Philippines — Giawhag ni gobernador Gwendolyn Garcia ang National Power Corporation (NPC) nga solusyonan ang problema sa kuryente sa isla sa Malapascua sa lungsod sa Daanbantayan.
Si Mayor Sun Shimura nagpatabang sa Probinsya sa Sugbo nga masulbad ang problema sa kuryente sa isla nga nakasinati og power outages sukad niadtong semana santa.
Ang Power Source Inc (PSI) maoy “provider” og kuryente sa isla ug aduna kini upat ka generators nga maoy nitubag sa dul-an 2 megawatt nga power demand sa isla. Apan sa upat ka generator, tulo ra niini nag operate. Ang PSI aduna usab problema sa karaan nga transformers.
Si Shimura nagkanayon nga nakaapekto sa mga tag-iya sa resort ug business operators ug sa mga residente ang power outages.
Tungod niini niawhag si Garcia sa NPC nga modeploy og power barge sa isla.
“We have an emergency situation here. Malapascua is a prime tourist destination. We cannot allow this island to go black” matud ni Garcia atol sa iyang tigom uban sa hepe sa NPC Visayas nga si Timoteo Diacor ug NPC operations and maintenance head nga si Marc Barcelona.
“You bring that power barge over here” dugang ni Garcia.
Si Diacor nisaad sa gobernador nga iya kining ipadangat sa ilang labaw alang sa dinalian nga approval.
Nitambong usab sa maong tigum ang mga opisyal sa Department of Energy Visayas Field Office, CEBECO II ug Malapascua Business Association. (BANAT NEWS)