CEBU, Philippines — Andam na ang Cebu City Police Office (CCPO) sa pagbantay sa umaabot nga Palarong Pambansa 2024 nga ipahigayon sa Siyudad sa Sugbo karong buwan sa Hulyo human sa kalamposan sa Central Visayas Regional Athletic Association(CVIRAA) sa miaging semana.
Matud ni Police Colonel Ireneo Dalogdog, City Director sa Cebu City Police Office ang epektibong pagpatuman sa security deployment sa CVIRAA nga gasugod sa Mayo 4 ug nahuman niadtong Huwebes, Mayo 9.
Apan gumikan kay gipaabot nga daghang delegado ang mangabot mas daghan sab nga kapulisan ang ilang ipakatap atol sa Palarong Pambansa 2024.
“Medyo maano to siya, daghan og contingents na, unlike this one atong mga athletes na-account nato nasa mga 12,866 lang so siguro pag Palarong Pambansa na basig times two or times three ang number of athletes during Palarong Pambansa,” sigon ni Dalogdog.
Niadtong Biyernes nibalik na sa ilang tagsa-tagsa ka units ang mga polis nga gi-augment sa CCPO kay mitabang sa pagbantay sa mga duwa sa CVIRAA.
Gipasalamatan sila ni Dalogdog sa ilang sakripisyo ug serbisyo nga gihatag aron masiguro nga malinawon ug malampuson nga mapahigayon ang CVIRAA. (BANAT NEWS)