Tulo ka bata nakalas tungod sa pertussis sa siyudad sa sugbo

CEBU, Philippines — Tulo ka mga bata ang nakalas sa Dakbayan sa Sugbo tungod sa pertussis ning tuig 2024 diin kasagaran niini walay mga bakuna.

Suma pa ni Dr. Daisy Villa ang pangulo sa City Health Department nga adunay 36 ka kaso sa pertussis ang dakbayan karong tuiga diin 12 ang laboratory confirmed ug 24 ang clinically confirmed.

Ang mga nakalas natala niadtong Enero 31, 2024 gikan sa Sawang Calero; February 7, gikan sa Talamban ug February 20, gikan usab sa Tejero nga nagagikan sa 16 days ngadto sa duha ka buwan ug pulos wala pay penta vaccine.

Dugang pa ni Villa, naalarma sila sa pagsaka sa kaso sa pertussis apan dili pa sila modeklarar og state of calamity tungod kay sukad pa niadtong 2017 aduna namay pertussis cases sa Sugbo.

Sa pagkakaron gihimo sa city health ang pagpamakuna sa kabataan ilabi na sa mga lugar diin dunay kaso sa pertussis. Gitigum usab ang mga opisyal sa barangay, health staff ug uban pa sa mga adunay kaso sa pertussis ilabi na sa pagpahibalo sa mga angayan nga buhaton.

Namatikdan usab ang mga kaso sa pertussis sa siyudad sa Mandaue ug Lapu-Lapu diin sagad sa mga biktima mga bata.

Kini ang gitug-an nila ni Dr.  Agnes Realiza ang City Health Officer sa siyudad sa Lapu-Lapu ug Dr. Debra Catulong City Health officer sa siyudad sa Mandaue.

Matud pa nila nga ilang gipaspasan karon ang pagbakuna sa pentavalent vaccines ngadto sa mga bata nga maoy dali nga matakboyan sa maong sakit.

Ang pentavalent vaccine subay sa gipahibalo sa World Health Organization (WHO) maoy panagang batok sa makamatay nga sakit sama sa diphteria, tetanus, hepatitis B ug pertussis. Si Dr. Realiza miingon nga niadtong Marso 25, usa lamang ka kaso sa pertussis ang natala sa siyudad sa Lapu-Lapu ug ang 15 niini nagpadayon pa ang ilang gihimong pakisusi.

Samtang si Dr. Catulong wala mohatag og tukmang gidaghanon sa nakasinati og pertussis apan iyang gikumpirmar nga adunay nakasinati niini sa siyudad sa Mandaue. Giawhag ang mga ginikanan sa pagkunsulta gilayon sa doctor sa higayon nga makasinate ang ilang mga anak og pag-ubo-ubo.

Samtang nipahimangno karon ang Department of Health Central Visayas sa katawhan nga magmatngon sa mga sakit nga motumaw panahon sa ting-init.

Suma pa ni Dr. Eugenia Mercedes Ca al ang Regional Epidemiologist sa Visayas Center for Health Development nga ang mga sakit nga motumaw panahon sa summer naglakip sa sunburn, sore eyes, skin diseases, heat stroke ug rabbies.

Si Ca al, nipahimangno sa publiko nga likayan ang pag tambal-tambal lang sa ilang kaugalingon sa sore eyes sama sa pagbutang og gatas, ihi, ug uban pa aron malikayan ang infection. Romeo T.  Limpangog (BANAT NEWS)