LCPO hugot nga nangandam sa panahon sa Semana Santa

CEBU, Philippines — Hugot na ang gihimo nga pagpangandam sa kapolisan sa Lapu-Lapu City Police (LCPO) sa pagdagsa sa mga turista nga mobisita sa siyudad sa Lapu-Lapu panahon sa Semana Santa.

Si Police Lieutenant Colonel Christian Torres nga maoy pangulo sa City Investigation Detection and Management Unit (CIDMU)ug tigpamaba sa Lapu-Lapu City Office (LCPO) miingon nga nahimo na gayod nilang kasinatian sa matag Semana Santa ang pagdagsa sa mga lokal ug mga langyaw nga mga turista nga mosuroy sa mga tourist destination sa dakbayan.

Kini ang hinungdan nga gipakatap ang mga tourist police diha sa mga lugar nga sagad tapokan sa mga turista.

Dugang pa ni Torres nga lakip usab sa ilang gipangandaman ang mga gikatakda na nga nagkadaiyang kalihokan sa dakbayan. Lakip na niini ang tinuig nga Kadaugan sa Mactan nga adunay gihan-ay nga mga kalihokan ang lokal nga kagamhanan ingon man ang umaabot usab nga pagpahigayon sa Ironman 70.3 nga pagahimoon usab sa bulan sa Abril niining tuiga.

Giklaro ni Torres nga walay augmentation force sa polis ang ipadala atol sa maong mga kalihokan tungod kay kanunay man nga nag-abag sa kapolisan sa LCPO ang mga friendly unit gikan sa Philippine Air Force (PAF) Naval Forces ug PNP Maritime Police nga nahimutang usab sa maong siyudad. (BANAT NEWS)