SK Chairman, magpapili pagka presidente sa federation

CEBU, Philippines — Usa ka semana human ang piniliay sa Barangay, aduna na'y nipadayag nga intresado nga magpapili pagka-presidente sa Sangguniang Kabataan Federation- Cebu City Chapter nga kasamtangang gihuptan karon ni Jeesica Resch.

Intresado mosunod sa posisyon ni Resch mao ang SK Chairman sa Barangay Guadalupe sa Dakbayan sa Sugbo nga si Matthew "Matt" Estenzo.

Ang Guadalupe maoy pinakadako nga barangay sa Dakbayan sa Sugbo.

Kasamtangang tinun-an sa Cebu Normal University si Estenzo nga mikuha sa kursong nursing.

Gitataw hinoun ni Estenzo nga nangunsulta pa siya sa iyang mga higala nga SK Chairman sa laing mga barangay ug nagmalaumon siya nga makaangkon og positibong feedback.

Gani dunay uban niini ang intresado usab nga masulod sa iyang line-up.

"Nagpadayon ang atong consultation, mapasalamaton ko nga dunay mga nisanong sa atong plano. Same raman gyud ta og goal, ang pagpadayon sa mga maayong programa alang sa kabatan-onan sa Cebu City," matud pa ni Estenzo.

Tingoha usab ni Estenzo ang paghingusog sa kabatan-onan alang sa pagsuporta sa kampanya sa Dakbayan alang sa Singapore-like Cebu City.

Sa pagka-karon, ang mga bag-ong napili nga opisyales sa SK sa nagkadaiyang barangay kay gipaubos og mga training.

Kahinumdoman nga sa niaging semana, gibutyag ni Cebu City Mayor Michael Rama nga gihatagan niya og kagawasan ang SK leaders sa pagpili sa mahimo nila nga pangulo sa pederasyon.

Gani gitambagan niya kini nga ilayo ang kaugalingon sa mga politiko sa pagpili sa ilang leader.

“Bati kaayo tan-awon nga masudlan (ang SK) sa mga politiko. Igsulod sa politiko, how I wish nga walay kwarta involve. Unsa naman ning kalakiha?” ni Rama pa. (BANAT NEWS)