Egay posibleng mapormang super typhoon

CEBU, Philippines —  Tropical Depression Egay posibleng mahimong severe tropical storm sa mosunod nga 24- oras ug posible pang mahimong super typhoon karong Martes o Miyerkules samtang nagtadlas sa habagatang silangang kadagatan sa Pilipinas sumala pa sa Philippine Atmospheric, Geophysical and Astronomical Services Administration (PAGASA).

Base sa datos nga gipagawas sa ahensya kagahapon adlaw nga Sabado, Hulyo 22, 2023 sa alas-11 sa buntag ang sentro sa tropical storm Egay gibanabana nga anaa sa 750 km sidlakan sa Virac, Catanduanes nga nagdala og hangin nga 65 kph duol sa sentro ug paghuros nga 80 kph ug nag-irog padulong sa kasadpan.

Ang wind signals mahimong ipataas sulod karong adlawa Sabado o sa Domingo, Hulyo 23, 2023 sa pipila ka mga dapit sa Bicol Region ug Eastern Visayas.

Gipaabot nga mokusog si Egay tungod sab sa hanging habagat.

Tungod sa dili maayong panahon gipahimangnoan ang publiko ug mga Disaster Risk Reduction & Management Offices (DRRMO) sa pagpangandam.

Ang mga tawo nga nagpuyo sa mga lugar nga peligro sa baha ug landslide sa paghiklin daan sa mas luwas nga lugar ug mag-monitor sa forecast sa panahon.- CNU Intern/IBM (BANAT NEWS)