DepEd nagtinguha sa pag- institutionalize sa blended learning
CEBU, Philippines — Giduso sa Department of Education (DepEd) ang pag-institutionalize sa blended learning isip permanente nga paagi sa paghatud sa edukasyon aron mapalambo ang sestema sa edukasyon sa Pilipinas.
Atol sa press briefing didto sa Malacañang si DepEd Undersecretary Michael Poa nagkanayon nga gipresentar karon sa buhatan ang two-track approach diin uban sa solusyon nga pagtukod og dugang mga classroom ug pag-hire og dugang mga magtutudlo gusto nilang ilakip ang paggamit sa teknolohiya isip usa sa mga lakang aron masolusyonan ang problema kabahin sa edukasyon.
Matud ni Poa nga tungod sa pandemiya nahibaw-an nila nga posible ang blended learning ug ang online classes hinungdan nga gusto nilang gamiton kini aron ma-decongest ang mga eskwelahan.
Gituohan nga epektibo kini ug efficient usab nga makasulbad sa mga isyu kabahin sa kakuwang sa mga magtutudlo ug mga classroom sa mas paspas nga panahon.
Apan sa dili pa ipatuman ang blended learning, si Poa nagkanayon usab nga kinahanglang sigurohon sa DepEd nga epektibo ang programa nga isagop pinaagi sa pagtan-aw sa labing maayong mga practice aron masiguro ang kalidad nga edukasyon.
Nakig-alayon usab ang DepEd sa CHED pinaagi sa Teachers Education Council (TEC) aron mapalambo ang sestema sa edukasyon sa Pilipinas.
Sa laing bahin, gitaho ni Poa ngadto ni Presidente Ferdinand “Bongbong” Marcos, Jr. ang kalamposan sa DepEd sulod sa usa ka tuig ingon man ang padayong mga giplano sa departamento.
Lakip sa mga gipresentar mao ang mga update sa kurikulum, ang mga kalamposan samtang nibalik na sa pagtungha, ang 28.4 milyones nga estudyante niadtong Agosto 2022 ug ang national learning recovery program.
Sugdan na sa umaabot nga Hulyo 24, 2023 ang national learning camps nga magtanyag sa pagpauswag, pag-consolidate ug mga kampo sa intervention alang sa mga estudyante atol sa school break. (BANAT NEWS)
- Latest
