FDA nilusad sa Taskforce Moccus
CEBU, Philippines — Gilusad sa Food and Drug Administration (FDA) ang Taskforce Moccus nga usa ka organizational unit ubos sa maong ahensiya aron masiguro nga luwas, epektibo ug dekalidad ang mga tambal ug bakuna batok sa African Swine Fever (ASF).
Ang maong unit nga gilusad ni Dr. Samuel Zacate, FDA director general maoy magsiguro sa evaluation sa mga tambal ug bakuna nga mamahimong magamit aron mapugngan ang pagkaylap sa sakit nga responsable sa dakong pagkunhod sa populasyon sa mga baboy sa nasud.
Niadtong buwan sa Marso 2023, na detect sa Probinsiya sa Sugbo ug Siyudad sa Sugbo ang ASF diin nipatuman dayon og protocol ang Department of Agriculture (DA) nga kinahanglang pamatyon ang tanang mga baboy nga anaa sulod sa "500-meter radius" diin na detect ang ASF hilabina sa backyard raisers aron dili mokatap ang virus.
Niadtong May 11, 2021 usab nipaubos sa state of calamity ang nasud sa unang higayon subay sa Proclamation No. 1143 tungod sa ASF outbreak diin bilyon ang naalkanse sa lokal nga sektor sa baboy ug mga kaalyado nga industriya.
Ug gumikan niini gisuportahan karon sa FDA ang programa sa kasamtangang administrasyon sa pag-rehabilitate sa lokal nga industriya sa mga baboy ug pagsiguro nga adunay igong supply sa mga produkto nga baboy nga barato alang sa katuyoan nga makab-ot ang siguridad sa pagkaon.
Sa pagkakaron, usa pa ka ASF vaccine Marketing Authorization Holder (MAH) ang nakasumite og aplikasyon apang sa Certificate of Product Registration (CPR) ubos sa Monitored Release (MR).
Giawhag sa FDA ang veterinary pharmaceutical industry sa nasud sa pag-apil sa Taskforce Moccus pinaagi sa pagsumiter og aplikasyon nga adunay kompletong mga dokumento isip pagsuporta sa mga paningkamot sa gobiyerno nga makontrolar ang infection sa ASF. (BANAT NEWS)
- Latest
