Rama nipahinumdum sa kamahinungdanon sa bandera

CEBU, Philippines — Nakigtimbaya usab kagahapon ang kagamhanan sa Siyudad sa Sugbo alang sa pagsaulog sa tibuok nasud sa 125th National Flag Day.

Adunay gipahigayong programa kagahapon sa buntag diha sa Plaza Sugbo  pagkahuman sa naandan nga flag ceremony ug gipahimangnoan ni Mayor Michael Rama ang katawhan alang sa paghatag og importansiya ug respeto sa national flag ilabi na sa kabilinhon niini.

Matud ni Rama nga pinaagi sa bandera mahinumdoman ang dakong paghigugma sa nasud ug ang pagbaton og paglaom ug kagawasan.

Nitambong usab sa maong kalihokan si Bise Mayor Raymond Garcia ug ubang opisyales sa siyudad.

Ang adlaw sa nasudnong bandera gisaulog isip handumanan sa unang paggamit sa bandera sa Pilipinas atol sa pagsaulog sa kadaogan sa Battle of Alapan niadtong 1898.

Matud usab ni Rama nga kanunay niya nga isulod sa iyahang huna-huna nga isip opisyal sa siyudad anaa sa katawhan ang iyahang tinuod nga gahum.

Ang paghatag og tarong nga serbisyo ngadto sa katawhan maoy pagpakita sa pagpangga niya sa nasud. (BANAT NEWS)