Special permit alang sa Semana Santa gilugwayan sa LTFRB
CEBU, Philippines — Gilugwayan sa Land Transportation Franchising and Regulatory Board LTFRB ang validity sa special permit alang sa pagsaulog sa Semana Santa. Ubos sa LTFRB Board Resolution No. 009, gilugwayan ang special permit gikan sa Abril 2 ngadto sa 11 giusab kini gikan sa Marso 31 ngadto sa Abril 17, 2023.
Hinuon giklaro ni LTFRB-7 regional director Eduardo Montealto, Jr. nga ang maong special permit alang lang sa mga buses.
Bus lang gyud kay pick - up passenger ni sila,” suma pa ni Montealto diin matud pa niya nga ang kantidad sa special permit mokabat lang sa P250.00. Samtang ang ubang mga public utility vehicles gawas sa mga taxi ang gitugotan nga mokuha og special permit apan kini sulod lang sa 3 ka adlaw og wa itugot ang pagpa pick up og mga pasahero.
“Ang uban pwede (like jeepneys and UV Express) but not the taxi pero three days lang and not to pick up passengers. Pwede for family use, religious activity, office excursions and similar use,” dugang pa ni Montealto.
Ang bayad alang sa tulo ka adlaw nga special permit mokabat lang usab sa P250.00 matag unit.
Ang paghatag og lugway sa gidugayon sa pagtugot sa special permit subay usab sa proklamasyon sa Malacañang nga nagdeklarar og regular holiday sa Abril 6, 2023, Huwebes Santo ug Abril 7, 2023, Biyernes Santo.
Ubos sa maong proklamasyon, ang Araw ng Kagitingan nga saulogon unta sa Abril 9, 2023 gisibog kini nga holiday ngadto sa Abril 10, 2023.
Base usab sa Facebook post sa LTFRB ang maong resolusyon gipagawas nonot sa napanglantawan nga pagdagsa sa mga pasahero nga manguli sa mga probinsiya gumikan sa taas nga holidays. Gikan sa The Freeman/MEL (BANAT NEWS)
- Latest
