Top 2 Most Wanted nadakpan, notadong kawatan nadakpan sab  

CEBU, Philippines —  Arestado ang gihulagway nga Top 2 Most Wanted Person sa Sugbu tungod sa kasong pagpatay ug dugay nang nagtago-tago gikan sa mga kamot sa balaod.

Ang nadakpan sa City Intelligence Unit sa Cebu City Police Office pinangulohan ni Police Lieutenant Colonel Henrix Parcon Bancoleta, Sabado sa hapon sa Belgium St., Brgy. Suba, Cebu City.

Ang kapolisan bitbit ang warrant of arrest batok kang Cifra Ocaba Laborte,23, sa kasong pagpatay nga giluwatan ni  Dax Gonzaga Xenos, Presiding Judge sa RTC Branch 23, Cebu City.

Matud pa sa kapolisan ilang nasigpatan si Laborte sa lugar kinsa dugay nang gipangita hinungdan ila dayon  kining gisusi ug gidakop.

Ang dinakpan anaa kasamtangan gibalhog aa Cebu City Police Office detention facility.

Sa laing bahin, nadakpan ang gipasanginlang notadong kawatan sa  Dakbayan sa Talisay diha sa Sitio Mananga 1, Barangay Tabunok niadtong Sabado sa kaadlawon.

Ang dinakpan mao si Sardel Salceda, 18, taga Sitio Long Dream, Barangay Bulacao sa nahisgutang siyudad.

Sa Police Lt. Col. Randy Caballes, hepe sa kapolisan nagkanayon nga adunay misumbong kanila labot sa pagpangawat og bisekleta sa suspek.

Sa pagresponde sa kapolisan nasikop ang suspek ug narekuber gikan kaniya ang bisekleta lakip na ang usa ka laptop nga gituohang iyaha sab kinawat.

Ang mga otoridad nakakuha sab og duha ka paketeng gidudahang  shabu ingon man .22 nga revolver nga adunay tulo ka bala.

Matud pa ni Caballes nga ang shabu nga nasakmit mitimbang og 10 gramos nga gibana-bana nga balor nga P68 mil.

Asoy pa sa hepe sa kapolisan nga nahibaw-an nga ang suspek makapila na kahigayon nasikop gumikan sab sa kaso nga pagpangawat.

Gibalhug siya sa bilangguan nga gikatakdang pasakaan og kaso karong adlawa. (BANAT NEWS)