Estudyante sa nursing hatagan og pasidungog sa CCPO

CEBU, Philippines — Imbitahon sa Cebu City Police Office (CCPO) sa ilahang flag raising ceremony karong Lunes  sa sunod semana ang nursing student nga nitabang sa babaye nga gigulgol ang liog sa niaging adlaw aron mahatagan og certificate of appreciation.

Ang biktima kalit nga gigulgol ang liog sa iyang kapuyo sa niadto Lunes gumikan sa pangabubho ug adtong higayona diha sa lugar nga nahitaboan ang tinun-an nga si Faith Ababat ug kini maoy daling nitabang sa biktima.

Gidayeg ni Cebu City Police Office Director Colonel Ireneo Dalogdog ang gihimo sa tinun-an nga nagpakita sa iyahang kaisog ug maayong pamatasan ug wala kini nagduha-duha sa pagtabang sa nanginahanglan.

Ang hepe sa Waterfront Police Station Major Henry Orbiso nagkanayon nga aduna nay kalamboan sa kahimtang sa biktima nga si Bernadetta Zamora.

Samtang kagahapon gipasaka ang kasong frustrated murder in relation to Republic Act 9262 kun “Violence Against Women and Children” batok sa suspetsado nga si Edwin Lumacad. (BANATNEWS)