Insurance alang sa pananum ug hayopan gitanyag sa siyudad

CEBU, Philippines — Labing maayo nga maniguro sanglit dili gyud matag-an ang panahon busa giawhag karon sa kagamhanan sa Siyudad sa Sugbo ang mga mag-uuma nga ilang ipa insured ang ilang mga tanum ug binuhi nga hayop.

Gisugdan sa niaging adlaw ang libre nga pag insured sa mga hayop ug tanum nga gidumala sa Philippine Crop Insurance Corporated PCIC inabagan sa buhatan sa city agriculture department.

Nagsugod kini sa barangay Adlaon ug Taptap nga pagasugdan usab dayon sa nagkalain-laing barangay ug giuna ang mga bukirang dapit.

Gihimo ang pag-rehistro sa mga mag-uuma sa “registry system for basic sector in agriculture”.

Magpadayon usab ang pag-apod apod sa mga gamit sa pag-uma ingon man usab ang pagdalit og technical assistance sa mga mag-uuma.

Gibutyag sa pangulo sa CAD nga si Joey Baclayon nga naandan na gyud nila nga gimbuhaton ang pag-abag ngadto sa mga mag-uuma aron ma insured kini sa PCIC.

“gamit gyud kayo ang insurance, ug dako gyud ang pasalamat nato sa PCIC,” matud pa ni Baclayon.

Sa datos sa siyudad sa niaging tuig dunay dul-an sa 11 mil ka rehistradong mag-uuma.

Nasayran nga adunay mga higayon nga apektado ang gipangtanom sa mga mag-uuma tungod sa dagan sa panahon.

Giawhag sa CAD ang uban pa nga mga mag-uuma nga gusto nga mopahimulos sa libre nga crops and livestock insurance nga mo coordinate lang sa nadestino nga technicians sa ilang barangay.

Ang city agriculture padayon usab kini sa paghatag og lecture o mga seminar ngadto sa mga mag-uuma sa ilang mga produkto. /MEL (BANAT NEWS)