Polis ‘nangilkil’ gidakop sa IMEG-7

CEBU, Philippines — Gidakop tungod sa pasangil nga pagpangilkil ang usa ka aktibong polis nga nagranggo og Police Staff Sergeant pinaagi sa entrapment operations sa mga kaubanan niining polis diha sa parking lot sa usa ka tambalanan kagahapon sa hapon diha sa Tres de Abril Street, Barangay San Nicolas, Siyudad sa Sugbo.

Giposasan ang maong polis sa hiniusang operasyon sa Integrity Monitoring and Enforcement Group(IMEG) ug ubang unit sa kapulisan sa rehiyon.

Ang maong polis kansang pangalan gipugngan una sa Banat News samtang giandam pa ang kasong ipasaka batok kaniya, nagpangidaron og 40 anyos ug nadestino kini sa usa sa mga police station sa Cebu City Police Office isip traffic investigator.

Gihimo ang operasyon subay sa reklamo sa usa ka residente sa Tres de Abril nga mipasangil nga gikilkilan kini sa maong pulis human siya gidakop niini atol sa police checkpoint sa Barangay Mambaling.

Subay sa maong hitabo, si Police Lt. Col. Gerard Ace Pelare, tigpamaba ni Police Regional Office-7 Director Brigadier General Jerry Bearis miingon nga pasakaan og kasong kriminal ug administratiba ang maong polis.

Gitataw ni Pelare ang PRO-7 dili mo-tolerate sa mga ingon ani nga binuhatan ilabi na nga tinguha gyud ni Bearis nga malimpyo gikan sa mga badlungon ang kapolisan sa rehiyon. (BANATNEWS)