Drug advocates umolon sa dakbayan sa Lapu-Lapu

CEBU, Philippines —  Ang mga drug surrenderees sa Dakbayan sa Lapu-Lapu umolon isip mga drug advocates ug bansayon pag martsa nga susama ug batalyon sa polis, sundawo ug sa ROTC.

Si Lapu-Lapu City Police Director Colonel Elmer Lim, mibutyag nga mao kini ang kamanduan sa bag-ong Regional Director sa Police Regional Office-7 General Jerry Bearis, nga ipatuman usab sa ubang dakong siyudad sa Central Visayas.

Sumala pa ni Lim, ang Drug Advocates nga molangkob sa usa ka batalyon kuhaon gikan sa drug surrenderees sa lain-lain nga barangay nga gipaagi sa Community Drug Rehabilitation Program sa Lapu-Lapu City Office for Substance Abuse Prevention kun CLOSAP nga gipangulohan ni Garry Lao.

Unipormado ang isul-ob sa batalyon sa drug advocates kay mao kini ang gamiton sa Arrival Honor sa mga bisita sa siyudad.

Laing tumong sa pag-umol sa Drug Advocates Battalion, sumala pa ni Lim aron maseguro nga masundan ang ilang kalihukan kun nahunong na ba gayud sila sa hingpit sa ilang mga bisyo sama sa paggamit sa illegal nga drugas.

Sa laing bahin nadakpan ang usa ka 55 anyos nga lalaki human siya napalitan og ginadiling drugas sa Drug Enforcement Unit (DEU) sa Dakbayan sa Talisay niadtong Miyerkules sa gabii didto sa Sta. Lucia road, Barangay Bulacao.

Ang nasikop mao si Reynaldo Abatayo Bastatas, taga Barangay Jaclupan ug kasamtangan nga nagpuyo sa maong lugar.

Sila si Police Captain Elwood Ebona mao ang nihimo sa operasyon nga miresulta sa pagkasikop sa suspek ug pagkasakmit sa shabu nga nitimbang og 3.25 gramos nga  gibana-bana nga mobalor og P22,100.

Nahibaw-an nga niadtong miaging tuig pa nagsugod sa ilegal nga kalihukan si Bastatas ug ang iyang operasyon diha sa luyo building sa usa ka telco sa Barangay Bulacao.

Makahimo siya sa pagbaligya og 10 gramos matag semana diin ang drugas nga iyang gibaligya gikan ni Joban nga taga siyudad sa Sugbo. — Rowena D. Capistrano/MEL