Nag-viral nga video sa mga nagrambol gipaimbestigar

CEBU, Philippines — Nag-viral karon diha sa social media ang video sa grupo sa mga lalaki nga nagrambol sa usa ka resto bar diha sa Panagdait, Barangay Kasambagan, Siyudad sa Sugbo.

Ang kapolisan sa Police Station 4 pinangulohan ni Police Major Eraño Regidor nipahigayon og imbestigasyon sa maong hitabo aron mailhan ang mga tawo nga nalambigit sa maong karambola aron mapasakaan kini og kaso sa nahimo nilang kalapasan.

“For now mao na atong gihimo nga action taken karon once nga ma-identify na, mao nay gihulat nato aron maka-take action ta regarding sa hitabo”, matud ni Regidor.

Apil usab sa imbestigasyon sa kapolisan ang pagsuta sa adlaw nga nahitabo ang insidente tungod kay nahibaw-an lang kini pinaagi sa viral video diin ang mga polis nagtuo nga taud-taod na ang maong hitabo ug niining ulahi lang gi-post diha sa social media.

Ang maong taho nakaabot usab kang Police Colonel Ireneo Dalogdog, direktor sa Cebu City Police Office (CCPO) kinsa nimando kang Regidor sa paghigayon og imbestigasyon niini. Si Dalogdog nihatag usab kini og direktiba kang Regidor nga mopahigayon og meeting tali sa bar owners diha sa Panagdait area aron marekomendar sa bar owners nga mag-hire sila og kaugalingong security guard aron mamentinar ang peace and order sa tagsa-tagsa nila ka establisamento.

Matud ni Dalogdog nga ang CCPO mo sumiter og report kang Konsehal Phillip Zafra kinsa maoy chairman sa peace and order committee sa konseho sa Dakbayan sa Sugbo aron ang siyudad makarekomendar nga i-show cause sa insidente nga nahitabo ang naasoy nga barangay.

“Kung saka-sakaling halimbawa ikaw tong tag-iya ani nga bar naa na puy another insidente nga nag-rambol diha sa imong establisamento siguro that’s the time nga ang Cebu City Police Office will recommend to the peace and order committee chairman for the cancellation or suspension doon sa business permit ng may-ari”, dugang ni Dalogdog. —Rowena D. Capistrano/BDB (BANATNEWS)