1 patay sa ginukdanay sa mga batan-on sa Talisay

CEBU, Philippines — Duha ka grupo sa mga batan-on ang nag ginukdanay nga naka among og motorista didto sa nasudnong karsada sa barangay Linao, Dakbayan sa Talisay.

Usa ka netizen nga si Kimmy Dora Kalma Lang maoy nakakuha sa video sa ginukdanay sa mga batan-on.

Matud pa niya nga natayming nga siya nagpagasolina niadtong Dominggo sa kadlawon dihang nagginukdanay ang mga batan-on hinungdan nga iya kini gikuhaan og video.

Lakip sa nagpadaplin ang mga pumpboy nga igo nalang sa pagtan-aw sa nag ginukuray.

Sa video kalit lang nga adunay nipaka ug nabagnos sa karsada ug ilang nakita nga usa kini ka motorsiklo.

Si kapitan Ulysses Raganas sa Linao niingon nga sa ilang pakisusi wala nagpuyo sa ilang lugar ang mga batan-on ug gikan lang kini nga nagdisco.

Sigon pa ni Police Lt. Col. Randy Caballes, pangu sa kapolisan sa Dakbayan sa Talisay nga didto sa diskohan nagkapasingitay ang duha ka grupo ug didto na sa karsada sila nagginukuray.

Usa ka drayber sa motorsiklo nga si Greg Adlawan padung na kining mouli padung sa  siyudad sa Sugbo ang nabagnos sa karsada dihang kalit nga nilabang ang usa sa mga batan-on.

Napangos si Adlawan apan ang nadasmagan namatay ug hangtud sa pagsuwat sa balita wa pa kini mailhi kay wala pa sab tagtungod ang ni claim niini.

Matud pa ni Caballes nga sa ilang pagsusi nakadakop sila og 18 anyos nga lalaki nga maoy giingon nga lider sa usa sa grupo.

Apan nagdumili pa kini sa paghatag sa pangalan samtang padayon pa nila nga gipangita ang uban nga grupo sa mga batan-on.

Samtang miabot sa 400 ka indibidwal nga gikan sa nagkalain-laing grupo ang nagtinabangay aron sa paghatag og seguridad sa tanang kalihukan sa kapistahan sa Dakbayan sa Talisay.

Atol sa opening salvo, nagtapok sila sa atubangan sa City Hall kuyog sa kapolisan, kabumberohan, BJMP, coastguard, CT-TODA, bantay dagat, barangay tanod, force multiplier ug mga sakop sa tulo ka fraternity sa siyudad.

Nalipay si Caballes tungod kay daghan sila nga mobantay sa kahapsan og kalinaw samtang nagsingabot ang kapistahan.

Iyang gipanghinaot nga mokooperar kanila ang Talisaynon ug mga bisita matag adlaw aron nindot nga masaulog ang kapistahan uban sa mga kalingawan. —MEL (BANAT NEWS)