Garcia niluwat og laing EO paglimpiyo sa kadagatan sa Cordova
CEBU, Philippines — Laing duha ka executive order ang giluwatan ni gobernador Gwendolyn Garcia alang gihapon sa tinguha nga malimpiyo ang kadagatan sa Lungsod sa Cordova.
Si Garcia unang niluwat sa Executive Order No. 35 nga nagdili sa paglangoy ug bisan unsa nga susamang kalihokan diha sa foreshore area, mangrove zone, public beach zone ug municipal fishing zone sa lungsod.
Kini human nasayran nga hugaw ang tubig diha sa maong lugar tungod fecal coliform bacteria.
Sa laing EO, gimando usab ni Garcia ang pagbungkag o tang-tang sa mga ilegal nga istraktura sama sa floating ug fixed cottages diha sa kadagatan sa Cordova sulod sa duha ka semana.
Kini ang nasabotan sa mga stakeholders atol sa tigom nga gihimo diha sa lungsod nga gipangulohan ni Garcia niadtong Septiyembre 20, 2022.
Sa maong tigom si Garcia nisaad sa mga apektado nga tag-iya sa cottages nga ang Kapitolyo mohatag og tabang pinansiyal nga P10, 000 ngadto sa 73 ka tag-iya sa floating cottages ug 54 nga tag-iya sa fixed cottages.
Base sa report sa Sugbo News ang 16 ka stall owners sa pantalan sa Bantayan Bay sa Barangay Poblacion nga apil sa ipaguba ang makadawat og P10, 000 nga tabang gikan sa Kapitolyo.
Ang 147 usab ka boat operators kansang panginabuhian ang maapektohan ang makadawat og P5,000.
Sa Oktubre 5, 2022 kadtong boluntaryo nga moguba sa ilang cottages o stalls maoy eligible nga makadawat og laing P10,000 nga kantidad sa Sugbo Negosyo cards nga mamahimong magamit pag-redeem gikan sa partner merchants sa Kapitolyo aron makasugod sila sa ilang patigayon. —Rowena D. Capistrano/BDB (BANATNEWS)
- Latest