Rama nangayo og dispensa nganong wala siya magpakita

CEBU, Philippines — Midepensa si Cebu City Mayor Michael Rama nga naigo sa Corona Virus Disease(COVID)-2019 hinungdan nga wala siya makapakita sa publiko sa milabay nga mga adlaw ilabi na niadtong nakasinati og mga pagbaha ang pipila ka lugar sa dakbayan sa Sugbo dihang mibundak ang kusog nga uwan.

Kini human ang mga tawo nangita kun asa ang mga opisyales sa Cebu City Government adtong higayona nga gikinahanglan ang ilahang presensiya sanglit dunay mga naapektuhan sa maong panghitabo.  Si Rama miingon nga nag-isolate siya sa iyang kaugalingon aron dili makatakod sa uban.  Hinoon gitataw ni Rama nga karon nga nahuman na siya sa iyahang home isolation mobalik na sab kini sa pagtan-aw ug pagsusi sa kahimtang sa siyudad sa Sugbo sama diha sa Kinalumsan River kun diin dunay clearing operation nga istraktura nga nasulod sa 3-meter easement. Gitataw ni Rama ang pagbakwi og balik sa 3-meter easement kabahin gyud sa first 100 days sa iyahang administrasyon.

“Dili man na mahuman tanan, importante ato gyud aggressively, massively i-control ang I will give the political will, gipang-assign na nako, pangguba sa building Atty. Gerone Castillo, unya moalegrar makakuha ta og daghang revenue tibuok siyudad sa Sugbo apil na ang Chamber, ug ang local finance, now si Gerry Carillo mao nay focus na sa 3-meter easement unya si Jerry Guardo sa North District na, ako nang gipang-assignan sila on 3-meter easement,” ni Rama pa. —Decemay P. Padilla/IBM (BANATNEWS)