Nag-viral nga esnatser nadakpan
CEBU, Philippines — Nadakpan atol sa buy-bust operation sa Villalon drive, Brgy. Capitol Site, Dakbayan sa Sugbo mga alas 4:10 sa hapon , Agosto 5, 2022 ang usa ka 31-anyos nga lalaki kinsa nag-viral sa social media tungod nanglabni og cellphone sa usa ka nurse niadtong milabay nga bulan.
Ang nasikop mao si Junior Lapina, 31, nagpuyo sa Sitio Motra, Barangay Tisa. Napriso niadtong 2018 tungod sa paglapas Sec.5, Sec 11 Art 2 RA 9165 Comprehensive Dangerous Drug Act of 2002. Niangkon si Lapina nga siya ang nilabni sa cellphone sa usa ka nurse gamit iyang motorsiklo tungod kay ang iyang anak na-admit sa tambalanan. Dugang pa sa suspek nga kapito na niya buhata ang pagpanglabni sa mga lugar sa dakbayan ug iya kining ibaligya.
Makita sa maong viral video nga ang lalaki nga giingong nurse migukod pa unta sa suspek ug mikabayo sa motorsiklo niini hangtud nga sila nangatumba. Nahitabo kikni diha sa Jones Avenue niadtong Hulyo 7,2022. Nabawi sa nurse ang iyang cellphone, apan nakasakay og balik ang esnatser sa iyang motorsiklo ug nakaikyas.
Sumala pa ni Police Major (PMaj) Nolan Primacio Tagsip hepe sa Police Station 2 nga pinaagi sa ilang intelligence buildup nasikop ang suspek human sa sunod-sunod nga follow up operations.
Naay nihatag og impormasyon kanila nga anaa sa maong dapit ang suspek ug namaligya sab kini og ilegal nga drugas maong nagpahigayon sila sa maong operasyon.
Nasakmit gikan sa suspek ang usa ka kalibre 38 nga rebolber nga adunay mga bala, 25 gramos sa gituohang shabu nga mobalor P170,000 ug usa ka motorsiklo nga gigamit sa transaksyon.
Si Tagsip nihangyo sa publiko ilabi na sa mga nabiktima ni Lapina nga modangop sa estasyonan para sa pagpasaka og tukmang kaso. — Letty G. Mariscal CNU Intern ug Mary Rose A. Carciller UV Intern/IBM (BANAT NEWS)
- Latest
