Holganza patabangon pagpanindot sa siyudad

CEBU, Philippines — Gawas sa iyang pagka-chairman sa Cebu City Traffic Management Coordination Committee, napun-an ang responsibilidad ni Atty. Rico “Koko” Rey Francis Holganza human siya gitudlo ni Mayor Michael Rama nga mangulo sa  beautification project “management board” nga dunay kalabotan sa tinguha sa mayor nga masusama sa Singapore ang dakbayan.

Gitigom ni Rama ang pipila ka mga department heads sa city hall ug stakeholders ug gihisgotan ang beautification project.

Sa taho sa Cebu City Public Information Office ,pipipila sa mga nitambong nagikan sa  Prevention, Restoration, Order, Beautification, Enhancement (PROBE); City Environment Sanitation and Enforcement Team (CESET); Cebu City Environment and Natural Resources Office (CCENRO); City Agriculture Department (CAD); Department of Public Services (DPS); Department of Social Welfare and Services (DSWS); Cebu City Transportation Office (CCTO); Cebu City Tourism Commission; pribadong sector; ug uban pa.

Matud ni Holganza, ang mga hingtungdang departamento nihimo na og mga pasiunang lakang sa pagpanindot sa dakbayan ug daghan pa sab ang mahimo nila sulod sa 100 ka mga adlaw sukad sa paglingkod ni Rama.

Isip tsirman sa CCTMC, makatabang si Holganza sa halapad nga pag-umol sa mga sistema aron pagsulbad sa problema sa trapiko sa siyudad.  Gisugdan na sa lokal na kagamhanan ang pagpabalik sa karaang park pinaagi sa paghawan sa mga temporary stalls ug pagbalhin sa mga mamaligyaay ngadto sa Carbon.

Sa pagbaton sa maong tinguha nga masusama sa Singapore ang siyudad, pipila ka mga labaw sa nagkadaiyang departamento nisugyot nga kinahanglan sab ipatuman sa dakbayan ang disiplina sa katawhan.

Gihangyo sab ni Rama ang publiko nga suportahan ang paningkamot sa iyang administrasyon aron makab-ot ang maong damgo nga mahimong usa ka highly developed nga siyudad ang Dakbayan sa Sugbo. —IBM (BANATNEWS)