Gisulod sa balay, gipusil patay

CEBU, Philippines — Usa ka 29-anyos nga lalaki ang gipusil-patay sa wala mailhing mamumuno sulod sa panimalay niini diha sa Purok 5, Barangay San Jose, Dakbayan sa Sugbo Lunes sa gabii.

Si Police Master Sergeant (PMSgt) Arniel Gabucan niila sa namatay nga mao si Jayson Suquib Abatayo, 29, residente sa maong dapit ug usa ka ex-convict sa kaso nga pagpanulis ug sa ilegal nga drugas.

Base sa imbestigasyon gikan sa giingong live-in partner sa biktima nga si Jolina Genovesa Cabinte, 20, alas 7 sa gabii dihang natulog siya kauban ang biktima ug ilang anak sa higdaanan sulod sa payag-payag nga ginama sa gaay niadtong higayona.

Kalit lang nga adunay wala mailhing tawo nga miabli sa ilang pultahan ug gipusil makausa ka higayon ang ulo sa biktima ug dalidaling miikyas.

Pagabot sa kapolisan patay na si Abatayo diha sa higdaanan ug dunay samad pinusilan sa ulo.

Nakuha diha sa crime scene ang usa ka basiyo sa bala sa .45 nga pistola. —Letty G. Mariscal CNU Intern/IBM (BANATNEWS)