‘Kawatan’ napusilan patay
CEBU, Philippines — Patay ang usa ka gipasanginlang kawatan human napusilan sa tag-iya sa panimalay nga iyang gitulis diha sa Sitio Almacin, Barangay Calamba, Dakbayan sa Sugbo alas 4:45 sa buntag, Hulyo 31, 2022.
Si Police Major (PMAJ) Eraño S. Regidor hepe sa Police Station 6 miila sa namatay ug sa gipasanginlang tulisan nga mao si Jason Gelig Laag alyas “Ison.”
Samtang ang tagbalay nga gikatahong nakapusil kaniya mao si Rogell Dela Cruz Guingoyon, 27, ug residente sa maong dapit.
Base sa inisyal nga imbestigasyon, nisulod sa balay ni Guingoyon ang namatay nga walay pananghid ug gikuha ang usa ka itom nga shoulder bag nga adunay sulod nga kwarta nga mobalor P20 mil, headset nga nagkantidad og P4,500 ug uban pang mahalong mga butang.
Sa dihang nagdali og biya sa lugar si Laag nakamata si Guingoyon tungod sa kasikas sa pultahan ug bug-at nga mga tunob.
Gikuha ni Guingoyon ang iyang lisensyadong armas nga gihulagway nga Glock 19 ug pagkakita niya nga bitbit ni Laag ang shoulder bag iya kining gisyagitan.
Sumala pa nga kalit nga gibunot ni Laag ang iyang armas nga gihulagway nga usa ka black widow nga Magnum .22 revolver ug iyang gitionan si Guingoyon hinungdan nga gipusil siya niini sa tiyan.
Human sa insidente, nanawag si Guingoyon sa Barangay Calamba alang sa ambulansya aron madala ang biktima (tulisan) sa tambalanan ug sa Counter Terrorism & Organized Crime Investigations Branch (CTOC) aron i-report ang maong insidente. Si Guingoyon boluntaryong miadto sa Police Station 6 aron i-surrender ug i-turnover ang iyang lisensyadong armas ug ang nakuhang armas nga gigamit ni Laag.
Temporaryo siyang gitanggong sa maong estasyonan aron mag-atubang og kasong kriminal, samtang si Laag nakabsan sa kinabuhi tungod sa naangkon nga samad sa iyang tiyan sumala sa pinakaulahing update sa tambalanan.— Letty G. Mariscal CNU Intern ug Mary Rose A. Carciller UV Intern/IBM (BANATNEWS)
- Latest