Tinun-an sa grade 11 nakuhaag P1.5m shabu

CEBU, Philippines — Usa ka 23- anyos nga grade 11 student ang nasikop human nasakmitan og 230 gramos sa gituohang shabu nga mobalor P1.5 milyon diha sa Sitio Rattan, Barangay Tangke, Dakbayan sa Talisay alas 10:30 sa gabii, Hulyo 29, 2022.

Ang Drug Enforcement Unit sa Talisay Police Station pinangulohan ni Police Lieutenant Colonel Randy Caballes mao ang nagpahigayon sa buy-bust operation kalabot sa Oplan Limpyo Talisay nga miresulta sa pagkasikop sa suspek.

Giila ang dinakpan nga si Jedy Selitorio alyas “Judy”, 23, residente sa Alaska Sentro, Barangay Mambaling, Dakbayan sa Sugbo, usa ka grade 11 student ug gikonsiderar nga high-value individual (HVI) listed.

Matud pa giangkon ni Selitorio nga maka-dispose siya og 250 gramos sa ginadiling drugas matag semana ug kini iyang i-dispose sa mga lugar sa Barangay Mambaling ug Tangke.

Gibutyag sab sa dinakpan nga ang iyang source usa ka residente sa Proper Alaska sa Barangay Mambaling.

Sa laing bahin, dugang tulo ka mga barangay sa Siyudad sa Mandaue ang gideklarar sa Oversight Committee sa Philippine Drug Enforcement Agency nga drug cleared na.

Ang siyudad duna na karoy siyam na ka mga barangay gikan sa 27 ka barangay nga drug cleared na. Ang nadugang nga tulo mao ang Paknaan,  Barangay Tabok ug Barangay Tingob.

Ang unang unom ka mga barangay sa siyudad nga gideklarar nga drug cleared mao ang Bakilid, Tawason, Casili,  Subangdaku, Opao ug Basak.

Ang matag barangay nga nadeklarar na nga drug cleared barangay ang nakadawat og P500,000 nga cash incentive nga gihatag sa kagamhanan sa Siyudad sa Mandaue.

Si Mayor Jonas Cortes mi-awhag karon sa mga barangay opisyal sa paghingusog sa ilang kampanya sa pagsugpo sa ilegal nga drugas tungod kay tinguha niini nga madeklarar ang siyudad nga drug cleared city. —Gabriel Bonjoc, Romeo T. Limpangog ug reports nilang Letty G. Mariscal CNU Intern ug Mary Rose Carciller UV Intern/IBM (BANATNEWS)