2.5 metric tons nga basura nahipos sa coastal clean-up

CEBU, Philippines —  Dili mominos 2.5 metric tons sa basura ang nahipos atol sa "Cebu City Legacy Grand Caravan" coastal clean-up nga gipahigayon sa miaging adlaw didto sa Il Corso Lifemalls sa South Road Properties (SRP).

Kini maoy gibutyag ni Atty. John Jigo Dacua, pangulo sa Department of Public Services (DPS) sa dakbayan.

Sa report sa Public Information Office (PIO) sa siyudad , si Dacua niingon nga kadaghanan sa mga basura nga nahipos posibling gikan sa silingang lugar nga  niabot sa Il Corso atol sa pagtaas sa tubig. Kini ilabi na nga ang mga basura nga moabot sa kabaybayonan gianod sa baha gikan usab sa taas nga mga barangay sa dakbayan.

Nagkanayon si Dacua nga ang gidaghanon sa mga basura nga nakolekta nagpakita nga ang mga tawo kulang sa disiplina sa kaugalingon, ug dili husto ang ilang paglabay sa ilang mga basura. Iyang giawhag ang tanan nga mahimong responsable sa paglabay sa ilang mga basura sa gilatid nga lugar sa dakbayan.

“Kita sa City Government dili man gud ta makabantay nila 24/7, lisud man kaayo. Ang ako lang untang hangyo sa mga tawo ba nga magbaton gyud og responsibility, disiplina sa kaugalingon, nga kanang manglimpyo sa ilang tugkaran dili magpataka og labay,” matud pa ni Dacua.

Ang pagpanglimpyo gipasiugdahan sa Cebu City Police Office (CCPO) uban sa pakigtambayayong sa kagamhanan sa dakbayan pinaagi sa Bantay Dagat Commission ug sa DPS.

Gisalmotan kini sa Philippine Coast Guard, Bureau of Fisheries and Aquatic Resources-7, PNP Maritime Group-7, Cebu City Agriculture Department, Department of Veterinary Medicine and Fisheries, Department of Environment and Natural Resources-7, Cebu City Fisherfolks Association, ug ang buhatan ni  Phillip Zafra nga maoy chairman sa Committee on Peace and Order sa City Council.

Ang "Scubasuseros", usa ka grupo sa mga boluntaryong scuba divers, miduyog usab sa maong aktibidad. — MEL (BANATNEWS)