Amahan nalandig sa tambalanan human dunggaba sa anak
CEBU, Philippines — Nalandig sa tambalanan ang usa ka amahan human kini unaya sa pagdunggab sa iyang anak gamit ang ice peak gumikan sa P200 nga sukli sa bugas niadtong Martes sa gabii diha sa Barangya Poblacion, Lungsod sa Dalaguete.
Ang biktima mao si Angelo Ocampo, 65-anyos, biyudo, drayber sa traysikad samtang ang suspetsado mao si Cirilo Ocampo, 41-anyos, ulitawo, drayber sa traysikol.
Matud ni Patrolman Jerson Entise, desk officer sa Dalaguete Police Station nga nasikop nila ang suspetsado atol sa ilang gihimo nga hot pursuit operation diin diha ra usab kini duol sa lugar nga nahitaboan.
Ang biktima nakaangkon kini og mga samad dinunggaban sa tiyan, buko-buko ug kamot ug dali kining gidala ngadto sa tambalanan. Ang suspetsado una gidetener sa detention cell sa Dalaguete Police Station gidala usab kini sa hospital gumikan sa huboy sa mata niini human naigo sa sukmag sa iyang amahan.
Base sa imbestigasyong sa kapolisan giingong ang biktima gisugo sa suspetsado og papalit og bugas ug wala na giuli ang sukli tungod kay giinom kini.
Ang amahan ug anak nagkalalis nga niresulta ngadto sa pagpanunggab.
Ang suspetsado nangangkon nga pareho silang nakainom sa iyang amahan apan giingong nasuko ang biktima dihang gipaninglan kini sa sukli sa bugas.
Giingong ang amahan unang nanukmag sa anak hinungdan nga nasuko ang naulahi ug nadunggaban ang amahan niini. BDB (BANATNEWS)
- Latest
