Pista sa San Juan nagmingaw sa Talisay

CEBU, Philippines — Nagmingaw ang kadagatan sa Larawan Beach sa Barangay Poblacion, Dakbayan sa Talisay atol sa kapistahan ni Sr. San Juan niadtong Biyernes, layo kaayo kini og kalainan sa nanglabay nga mga kapistahan.

Ang manindahay og sinugba, kinilaw ug lechon nihulagway nga menos ang mga tawo nga nidagsa sa kadagatan.   Sukwahi kini sa mga naandan nga katuigan nga pwerteng alegreha ug dakudako sila og halin.

Apan sila nagtuo nga tungod kini kay bag-o lang nga gipalugakan ang estado sa kwarantinas diin duha ka tuig gyud nga giisip lang nga ordinaryo nga adlaw ang kalihukan.

Pero ang kapulisan sa Dakbayan sa Talisay wa mikumpyansa ilang gipangsuroy ang mga coastal barangay aron masiguro ang kaluwasan sa katawhan.

Ila sab nga gihangyo ang mga barangay tanod nga moabag kanila lakip nasab ang mga coastguard nga naa sa Syudad sa Talisay.

Hinuon nahuman ang adlaw nga wala mga dautang panghitabo nga gialarmahan sa otoridad.

Si Police Lt. Col. Randy Caballes, hepe sa kapulisan niingon nga mapasalamaton siya nga maayo ra ang dagan sa kalihukan. Ingon man sa pagtabang sa nagkadaiyang ahensya sa goberyno sa pagmonitor sa kahapsay ug kamalinawon. — /IBM (BANAT NEWS)