Lapu-Lapu magtukod og kapuy-an sa drug dependents

CEBU, Philippines — Gitinguha sa kagamhanan sa Siyudad sa Lapu-Lapu ang katukoran sa edipisyo sa “Bagong Silangan” nga kapuy-an sa drug dependents nga ipaubos sa rehabilitation program sa siyudad.

Si Gary Lao, pangulo sa City of Lapu-Lapu for Substance Abuse Prevention (CLOSAP) nagkanayon nga nunot sa maong tinguha mobisita sila ngadto sa Bangar, La Union sa Hunyo 28 hangtud sa Hunyo 30, 2022.

Matud ni Lao nga daghan na ang mga nakapatukod og susamang proyekto apan ang Bangar, La Union maoy labing nag- una niini.

Si Lao nagkanayon nga tinguha nila nga sundon ang pagpadagan sa maong pasilidad sa itukod unya nga Bagong Silangan sa Dakbayan sa Lapu-Lapu.

Nasayran nga ang lokal nga kagamhanan sa maong siyudad ang nakigpirmahanay na og memorandum of agreement (MOA) uban sa Philippine Drug Enforcement Agency (PDEA)-7 kauban sa House of Hope nga usa ka private drug rehabilitation facility sa Barangay Gun-ob.

Sa maong MOA ang kagamhanan sa siyudad maoy mogahin og pundo alang sa admission sa drug dependents ug ang PDEA-7 ang mo superbisar alang sa pagpatuman niini.  BDB (BANATNEWS)