4-anyos nga bata padayong gipangita

CEBU, Philippines — Usa ka 4-anyos nga batang lalaki kinsa wala na igkita sulod sa upat ka adlaw ang padayon karon nga gipangita sa iyang pamilya ilabi na ang inahan niini kinsa nabalaka kaayo karon sa kahimtang sa iyang anak ug nanawagan kini karon ug tabang sa netizens.

Ang bata giila nga si Seon IVern Ebesa, residente sa Sitio Pandayan, Barangay Basak San Nicolas, Dakbayan sa Sugbo ug kataposan kini nga nakit-an niadtong Domingo sa hapon diha sa ilang lugar.

Ang inahan niini nga si Flishette Ebesa nagbibit og mga hulagway sa iyang anak aron ipangpamilit diha sa mga lugar sa pamasin nga adunay makakita sa iyang anak.

Gibutyag ni Ebesa nga ang pagkawala sa iyang anak ikaupat na kini nga higayon ug sa nanglabay nga insidente nakauli ra tungod kay ilaha kining nakit-an.

Ug kasagaran nga hinungdan nga molakaw ang iyang anak tungod kay mangita kini sa iyang apohan ilabi na sa higayon nga dili kini makakita kong molakaw ang apohan niini.

Matud ni Ebesa nga niadtong Domingo sa oras nga nilakaw ang iyang anak nakatulog siya tungod kay panggabii ang iyang duty sa trabaho ug ang apohan niini ang nagbantay.

Si Ebesa nanghangyo sa nakakita o nakapunit sa iyang anak nga ibalik kini diin nagatuo siya nga aduna kini nakuyogan.

Ang maong hitabo nataho na sa pamilyang Ebesa ngadto sa kapolisan.

Giawhag ni Ebesa ang mga nakakita sa iyang anak nga motawag sa iyang cellphone number 09293721308. —BDB (BANATNEWS)