P7.4 milyong shabu nasakmit
CEBU, Philippines — Usa ka 27-anyos nga lalaki ang nasakmitan og P7.4 milyones nga balor sa ginadili nga drugas atol sa gipahigayon nga buy-bust operation sa may New Imus Road, Sitio Riverside, Barangay Lorega-San Miguel ning Dakbayan sa Sugbo kagahapon sa kaadlawon.
Ang dinakpan naila nga si Jonathan Conahap, alyas Atan, residente sa Sitio Ponce 2, Barangay Carreta. Ang Station Drug Enforcement Unit sa Parian Police Station nga gipangulohan sa ilang hepe Police Major Efren Diaz Jr. uban sa pakig-alayon sa PDEA-7 nihimo og buy bust operation sa maong dinakpan.
Nasakmit gikan sa dinakpan ang 1100 grams nga gituohang shabu nga adunay street drug value nga mobalor og P7,480,000.00; buy bust money ug sudlanan niini.
Si Conahap, gitan-aw sa kapulisan nga usa ka bodegero sa ginadili nga drugas ug mokita og libo kapin matag 200 gramos nga iyang madispatsar sa nagkadaiyang lugar sa dakbayan. Ang kapulisan padayon pang nipalawom sa ilang imbestigasyon sa tinubdan sa ginadili nga drugas ni Conahap, kinsa gipaubos sa dili mominos duha ka semana nga surveillance nga niresulta sa malampuson nga pagka sikop niini.
Sa laing bahin, makadawat og tag P50 mil nga cash ang buhatan sa kapolisan sa Lapu-City Police Office (LCPO) ug ang Philippine Drug Enforcement Agency (PDEA) 7 tungod sa pagkasakmit sa upat ka kilong shabu nga nagkantidad og P27.2 milyones gikan sa nadakpang babayeng gipasanginlang drug pusher dili palang dugay.
Si Gary Lao, pangulo sa City of Lapu-Lapu Office for Substance Abuse Prevention (CLOSAP) nga nahinabi sa mga tigbalita miingon nga si Mayor Junard Chan nipahibalo bahin niini.
Ang kapolisan sa LCPO ug PDEA 7 ang nagpahigayon og joint buy bust operation nga miresulta sa pagkasikop ni Leonora Quistadio,43, taga Barangay Quezon, Lungsod sa Tagbina sa Surigao del Sur.— Romeo Limpangog/IBM (BANATNEWS)
- Latest
