Baradong kanal giatiman tungod sa hulga sa dengue
CEBU, Philippines — Gitutokan karon committee on infrastructure sa konseho sa siyudad sa Sugbu ang pagpaayo sa mga kanal nga nangabara ug napundohan na hinuon ug tubig ug gihimong itloganan sa mga lamok, lakip ang lamok ng nagdala og sakit nga dengue.
Si Konsehal Jerry Guardo , tsirman sa maong komitiba nga duna gyuy problema sa nangapundong tubig sa mga baradong kanal sa pipila ka mga sitio nagkadaiyang barangay sa siyudad.
Sa Barangay Labangon nakasinati og baha ang sitio Sto. Niño Latressas, Osmeña Drive, Cabrera Compound ug Cardones Residences.
Si Grace Abella, residente sa Sto. Niño Latressas miingon sukad pa niadtong 2020 sila naproblema sa baha.
Iyang gitumbok ang gitukod nga perimeter fence sa ilang dapit nga nakaali sa gawasanan sa tubig maong mosulod na sa ilahang mga panimalay.
Si Guardo miingon nga misanong ang pribadong kompanya sa ilang hangyo nga butangan og kanal ang gitukod nilang perimeter fence aron molahos kini sa drainage paingon sa Natalio Bacalo Avenue ug dili magpundo ang tubig nga delikado sa mga sakit sama sa dengue.
Sa Lapu-Lapu City, miapelar si Mayor Junard ‘Ahong’ Chan sa mga Oponganon sa pagpanglimpiyo sa palibot aron paglikay nga puy-an sa mga lamok nga nagdala og sakit nga dengue.
Si Dr. Agnes Realiza, pangulo sa Lapu-Lapu City Health Office miingon nga nakatala sila og 821 ka mga kaso sa dengue sukad sa Enero hangtod sa Mayo 31, 2022, ang 50 niini padayon pa karong giatiman.
Gimando ni Chan nga palimpiyohan ang mga kanal, mga tubigan, mga guma, flower base ug mga sapa sa siyudad. —/IBM (BANAT NEWS)
- Latest