3 patay sa managlahing aksidente sa motorsiklo

CEBU, Philippines — Duha ka managlahing aksidente sa motorsiklo ang mikalas og tulo ka kinabuhi sa Dakbayan sa Lapu-Lapu ug sa lungsod sa Tabuelan niadtong Domingo.

Nakalas ang duha nga sakay sa motorsiklo human kini malamba sa kurbadahon nga bahin sa Marcelo Fernan Bridge sa Pusok, Siyudad sa Lapu-Lapu.

Si Police Senior Master Sergeant Alain Bandolon sa Lapu-Lapu City Police Office (LCPO) miila sa mga namatay nga mao sila si Junard Esconde Alpas, 26 anyos nga nagtrabaho sa usa ka water refilling Station ug molopyo sa Barangay Alang-Alang Siyudad sa Mandaue ug Bethoveen Pancho Tobias 33 anyos nga molopyo sa Barangay Tabok sa Siyudad sa Mandaue.

Matud pa ni Bandolon nga nabunal sa sementadong bahin ang duha ka mga biktima dihang kalit lang nga nalamba sa kurbadahon nga bahin sa Marcelo Fernan Bridge ang ilang gisakyan nga motorsiklo.

Si Tobias namatay on the spot samtang si Alpas ang namatay usab pipila ka oras human madala sa tambalanan.

Samtang laing namatay sa aksidente sa motorsiklo didto sa lungsod sa Tabuelan. Si Police Lieutenant Robert Juban sa Tabuelan Police Station miila sa namatay nga mao si Renerio Panares Jr., 26 anyos nga taga Barangay 8 sa Lungsod sa Tuburan.

Suma pa ni Juban nga nakaangkon og grabeng kadaut sa iyang kalawasan ang biktima nga gituohang nalahos sa pagkahagbong uban sa giluwanan niining motorsiklo.

Ang kapulisan sa lungsod padayon pa karon nihimo ug imbestigasyon may kalabutan sa maong insidente.— Rowena D.Capistrano/MEL (BANATNEWS)