Magtutudlo sa Lapu-Lapu nakadawat na sa honorarium
CEBU, Philippines — Nakadawat sa ilang honorarium ang 98 porsiyento sa mga magtutudlo sa siyudad sa Lapu-Lapu nga nagserbisyo sa miaging Mayo 9, 2022 nga national ug local elections.
Kini ang gibutyag ni Lapu-Lapu City Treasurer Felicitas Baguio kinsa mitug-an nga ilang gisugdan sa pag-apod- apod ang honorarium niadto pang Mayo 21, 2022.
Gipaagi nila ang distribution sa matag barangay sa siyudad.
"Actually target gyud unta namo Sabado ug Domingo ang pagpanghatag sa ilang honorarium apan mihangyo man ang election officer sa siyudad nga tiwason na lang namo sa pagpanghatag," ni Baguio pa.
Adunay 1,600 ka mga magtutudlo ang niserbisyo sa nilabay nga piniliay sa siyudad, diin nakadawat sila ug 4,800 ngadto sa P8, 000 nga honorarium depende sa ilang gihuptan nga kaakohan sa miaging election.
Dugang pa ni Baguio, mahimo pa mokuha sa ilang honorarium ang wala pa makakuha ug moadto lang sila sa buhatan sa Commission on Elections.
Gitataw ni Baguio nga naghimo na sila sa ilang liquidation alang sa pagtugyan na og balik niini ngadto sa buhatan sa Comelec. — Rowena D. Capistrano/MEL (BANATNEWS)
- Latest