Reward sa drug-cleared brgy sa Lapu-Lapu nahatag na

CEBU, Philippines — Gitunol ni Mayor Junard Ahong Chan ang tseke nga nagkantidad og P50 mil isip reward sa barangay Tungasan sa Isla sa Olango sa Siyudad sa Lapu-Lapu.

Kini nunot usab sa pagdeklarar sa maong barangay nga drug cleared barangay sa Regional Oversight Committee on Barangay Drug Clearing Program niadtong Septiyembre 28, 2021.

Ang tresurera sa barangay Tungasan nga si Iglecia Inoc maoy nagdawat sa tseke nga gitunol ni Mayor Chan.

Si Gary Lao nga maoy pangulo sa City of Lapu-Lapu Office of Substance Abuse Prevention (CLOSAP) miingon nga nalangan ang pagtugyan sa maong reward tungod sa election ban   nga gipatuman sa Commission  on election.

Matud pa ni Lao ang maong kantidad nga gihatag sa siyudad dako kaayo og ikatabang alang sa pagpalambo pa ilang kampanya ug mga kalihokan sa barangay nga naglambigit sa ilegal nga drugas.

Samtang sa laing bahin upat ka durugista ang sunod-sunod nga gipangdakop sa kapulisan sa Dakbayan sa Talisay sa nagkalain-laing barangay.

Unang operasyon gihimo sa sitio Neighborhood, barangay Tabunok mga alas 3:16 sa kadlawon.

Nasikop si Van Excel Estoconing Labra alyas Niño, 22 anyos nga nagpuyo sa nahisgutang lugar.

Ang shabu nga nakuha kaniya mitimbang og 10 gramos nga gibana-bana nga mobalor og P68 mil ka pesos.

Mga alas 4 sa kadlawon, nasikop si Raymart Cantila Unabia alyas Xhan, 23 anyos didto sa sitio Colis, barangay Tabunok.

Nakuha nga shabu gikan kaniya nitimbang og 25 gramos nga adunay balor nga P170mil ka pesos ug giingong tinubdan sa drugas mao ang amigo niini nga naa sa Cebu City Jail.

Laing nadakpan mao sila si Lindon Codera Cabajar alyas Daot, 32 anyos ug si Jesseca Dingding Cabajar, 27 anyos.

Nakuha gikan kanila ang shabu nga nitimbang og 25 gramos nga adunay balor nga P170mil ka pesos.

Samtang ang tinubdan sa shabu sa mga dinakpan nailhan nga si Loyd nga naa sa Abuyog Leyte. Gabriel C. Bonjoc/MEL (BANATNEWS)