Lalaki patay human nibangga sa kural sa Fuente Osmeña Circle
CEBU, Philippines — Patay ang usa ka 28-anyos nga lalaki kinsa gituohang nakainom og ilimnong makahubog human aksidenteng nibangga ang gimanehong motorsiklo niini diha sa kural sa sa Fuente Osmeña Circle, Barangay Capitol Site niadtong tungang gabii sa adlaw nga Martes. Ang biktima mao si Gabriel Catelo, residente sa B. Rodriguez Street, Dakbayan sa Sugbo.
Matud ni Police Major Nolan Primacio Tagsip, hepe sa Abellana Police Station nga wala magsul-ob oghelmet ang biktima dihang nagmaneho kini sa motorsiklo.
Ang biktima nakaangkon og grabeng kadaot sa ulo human kini naparok ngadto sa kural tungod sa kusog sa impact sa bangga.
Si Tagsip nagkanayon nga ang partner ni Catelo nitug-an sa kapolisan nga ang biktima nag-inom diha sa ilang balay sa wala pa kini nilakaw aron magpagasolina.
Base sa imbestigasyon sa kapolisan nga samtang nagbiyahe si Catelo gikan sa ilang balay aron magpagasolina dihang padulong na kining moliko nilahos ngadto sa kural sa Fuente Osmeña Circle ang motorsiklo.
Gibutyag ni Tagsip nga ang partner ni Catelo nitug-an kanila nga kasagaran kon makainom ang biktima kusog kining mopadagan sa iyang motorsiklo. —BDB (BANATNEWS)
- Latest
