Nakalas kang agaton nagkadaghan

CEBU, Philippines — Nag-anam og kadaghan ang mga natalang nakalas tungod sa bagyong Agaton didto sa Baybay City sa Leyte ug dinhi sa Sugbu.

Base sa bag-ong impormasyon gikan sa Baybay City Disasteer Risk Reduction and Management Office 25 na ka tawo ang kompirmadong nakalas tungod sa landslide didto sa napulo ka mga barangay.

Si Michael Cañete, Radio Operator sa Baybay City DRRMO  miingon nga napadayon pa gihapon ang retrieval operation tungod kay duna pay mga residente nga na-missing.

Napulo ka mga barangay ang grabeng naigo sa landslide ug ang tulo niini maoy nagrabehan nga mao ang  Cantagnos, Mailhe ug Bunga nga nabanlas gyud sa lapok ang kabalaya.

Ang mga rescuers matud pang Cañete naglisod sa pag-atraka sa site tungod sa padayong pagbunok sa ulan ug humok usab kaayo ang maong mga yuta.

Ang Visayas Command pinangulohan ni Lieutenant General Robert C Dauz nipadala na og 19 ka teams inabagan sa mga CAFGU active auxiliary (CAA) dala ang mga humanitarian equipment  sa mga lugar sa Samar, Eastern Samar, Leyte, ug Southern Leyte.

Apil sa mga gipadala ang mga military trucks, military ambulance, payloader, prime mover, ug dump trucks.

Gibutyag sa VISCOM nga  moabot na 2,000 ka tawo ang naluwas sa grabeng pagbaha sa Ormoc City, 556 sav ang nasalbar nila gikan sa Baybay City.

Ang mga rescue units naka-recover na og 25 ka patay’ng lawas ug 76 ang nangaangol samtang nagpadayon ang search, rescue, and retrieval operation sa mga naapektahang barangay sa Baybay City.

Sa Sugbu, patay sab ang 22-anyos nga si Joshua Salgarino sa Sitio Kan-anao, Barangay Poblacion, Oslob kagahapon sa buntag human natumpagan sa gikubkob nilang anapog bisan og nagsige ang bunok sa uwan.

Matud pang Police Master Sergeant Albert Almario, Investigator sa Oslob Police Station nakabantay ang mga kauban ni Salgarino ug nakadagan, apan kini natabunan ug ala-una na sa udto nakuha ang iyang lawas.

Si Almario, niawhag sa katawhan ilabi na kadtong nanimuyo sa mga low-lying areas o kaha sa mga kabukiran nga magmatngon kanunay tungod aning pagsige og ulan nga nakapahumok sa yuta.

Tungod sab sa bagyo kanselado pa gihapon ang tanang mga biyahe sa barko gikan sa Sugbu padung sa mga lugar nga naapektahan.

Samtang ang Talisay City, gilugwayan ang suspension sa klase ug sa trabaho tungod gihapon sa maong bagyo.— Gabriel Bonjoc/IBM (BANATNEWS)