Babaye ug lalaki gipamusil patay

CEBU, Philippines Babaye ug lalaking nagsakay og motorsiklo gipamusil patay sa Purok Gemilina Barangay Tilhaong, Lungsod sa Consolacion kagahapong sa hapon.—

Ang mga biktima giila sa kapolisan nga sila si Marites Aniñon ug Perlito Lacaron pulos hamtong ang panoigon ug taga Dakbayan sa Sugbo.

Matud pa ni Police Staff Sargent Rechei Gilleran, imbestigador sa maong kaso, pag-abot nila sa maong dapit nagbuy-od na kilid sa motor nga gisakyan ang  mga biktima ug dunay daghang samad pinusilan sa kalawasan ug wala nay kinabuhi.

Wala pay nahipos nga dugang impormasyon ang kapolisan aron pag-ila sa mga mamumuno ug kun unsay motibo kun nganong gipamusil ang duha.

Samtang gisusi pa sab kun magkadugo ba ang mga biktima ug  unsa ilang gibuhat sa lugar.

“Sa pagkakaron wala pa tay nakuha nga suspek ug sa motibo sa pagpamusil padayon pa atong imbestigasyon,” sigon ni Gilleran.

Sa laing bahin, patay sab ang usa ka lalaking nagsugba-sugba kilid sa karsada tungod nagsaulog og birthday ang iyang uyab sa dihang kalit kining gipusil diha sa Sitio Lawis, Barangay Lorega sa Dakbayan sa Sugbo niadtong Miyerkules sa gabii.

Ang gipatay mao si Arnie Puyat, 26,  residente sa Barangay Guadalupe. Ang biktima giingong nagluto daplin sa dalan dihang gipusil sa nagbinugtong nga wala mailhing mamumuno.

Si Police Staff Sergeant Nemesio Denopol, sa Pari-an Police Station nitug-an nga ilaha pa karong gisusi ang background sa biktima ug tan-awon usab ang mga kuha sa CCTV cameras sa lugar nga posibleng makatabang sa imbestigasyon.— Rowena D. Capistrano/IBM (BANATNEWS)