Langyaw nga mga turista namalik na
CEBU, Philippines — Human sa sobra duha ka tuig nga pandemya sa coronavirus disease (Covid-19) ug nasira ang mga tourist spots sa Sugbu, naganam-anam na og balik ang mga langyaw nga turista sa lungsod sa Oslob.
Ang Oslob usa sa mga inila nga tourism destinations sa habagatang bahin sa Probinsya tungod sa whale shark watching sa barangay Tan-awan.
Kagahapong adlawa, maoy unang adlaw nga adunay mga langyaw nga nisuroy ug nisuway sa whale shark watching.
Matud ni Zenaida Nepomuceno, tag-iya sa Sharky Hostel nga first time nila makadawat og bisita kagahapon didto sa Tan-awan.
Ilang gipaabot nga modaghan pa ang mga langyaw nga mobalik og bisita sa ilang tourist spots. Gani matud niya aduna nay sila bookings ini’g ka Marso ug Abril.
Dili palang dugay, giablihan sa Pilipinas ang mga utlanan niini para sa mga langyaw nga turista niadtong Pebrero 10, 2022.
Si Evangeline Lugas nga usa usab ka tindera sa mais didto sa Tan-awan nagkanayon nga mao pa sab sila makakita balik kagahapon og mga turistang langyaw sukad nga nagsarado ang turismo tungod sa pandemya.
Matud sa maong mga residente kasagaran nila nga mga bisita karon mga turistang lokal pa.
Sa dihang miigo ang pandemiya sa Covid-19 nga maoy hinungdan sa paghunong sa ilang operasyon napugos ang mga tourism operators pangita og laing panginabuhian.
Si Gob. Gwendolyn Garcia nagkanayon nga ang international market maoy backbone sa turismo sa probinsya hinungdan nga gitugotan na nila ang pagsulod bisan ang mga dili bakunadong langyaw ubos sa pipila ka kondisyon sugod karong Marso 1, 2022.
“Ang nagdala gyud og kinabag-an nga negosyo sa atong turismo diri, kadtong gikan sa Korea, Japan ug China,” matud ni Garcia atol sa stakeholders meeting ug Provincial Tourism Task Force didto sa lungsod sa Moalboal kagahapon.
Ang turismo mao say economic driver sa pipila ka mga lungsod sa Probinsya sa Sugbo.— IBM (BANATNEWS)
- Latest