Christmas Party ipahigayon sa open area—Garganera

CEBU, Philippines — Giangkon ni Cebu City Councilor Joel Garganera, hepe Emergency Operations Center Cebu City nga adunay ubang tawo nga dili gyud kapugong  nga mopahigayon og mga Christmas Party hinungdan nga iyaha kining giawhag nga adto kini ipahigayon sa “open area” o alfresco set-up.

Apan kon anaa kini sulod sa establisamento kinahanglang aduna kini hustong kagawsan sa hangin o maayong bentilasyon.

Giklaro ni Garganera nga iyaha lang kini nga sugyot aron masiguro nga mapatuman  ang health protocols.

Matud ni Garganera nga labing maayo nga fully vaccinated ang mga moapil sa Christmas Party tungod kay bisan nagkaubos ang kaso sa COVID-19 sa Siyudad sa Sugbo wala nagpasabot nga mokompiyansa na ang mga tawo.

Matud usab ni Garganera nga dili siya gusto nga mahisama ang Sugbo sa nahitabo sa ubang nasud diin nisaka og balik ang kaso sa COVID-19 human gipaloagan og maayo ang restrictions.

Subling gipahinumduman sa EOC ang katawhan nga dili kalimtan ang pagtuman sa health protocols.

Dugang ni Garganera nga importante ang pagpabakuna gumikan kay kong bakunado ang tawo dili grabe ang mahimong kahimtang niini kon mataptan kini sa COVID-19. —BDB (BANATNEWS)