Pagdakop sa mga bikers nga makalapas sa trapiko gihugtan

CEBU, Philippines — Mas gipahugtan pa sa Dakbayan sa Talisay ang pagdakop sa mga magbisekleta nga di motuman sa lagda sa trapiko.

Kini human nakita nga nagkadaghan ang disgrasya nga nahitabo gumikan sa badlungon nga mga bikers.

Matud pa ni Jonathan Tumulak, traffic czar sa Syudad sa Talisay nga tagaan nila og disiplina ang mga bikers aron malikayan ang disgrasya.

Sa buwan sa, Septiyembre nakatala og 10 ka disgrasya sa bisekleta ang Talisay apan karon sa usa ka semana sa buwan sa Nobiyembre nakatala na sila og pito ka disgrasya nga naglambigit sa bikers.

Ang pipila ka panghitabo nakuha sa CCTV footage sa Dakbayan.

Samtang sa laing bahin mapasalamaton ang kadagkuan sa buhatan sa Cebu City Transportation Office CCTO sa bag-ong motorsiklo nga ilang nadawat nga nagamit sa ilang operasyon batok sa mga malapason sa balaod sa trapiko.

Matud pa sa kadagkuan sa CCTO, ang ilang bag-ong motor dako ug tabang sa ilang operasyon pagsikop sa mga violators ilabi na kadtong anaa sa mga hagip-ot nga dalan.

Ang CCTO naka-isyu ug 20 ka traffic citation ticket sa mga nagparking sa bike lanes gikan sa F. Llamas, Punta, Tisa, ug V. Rama.

Naka impound usab ang CCTO ug 2 ka mga e-bike.

Awhag sa CCTO ngadto sa mga driver nga mosunod lang gayud sa balaod sa trapiko aron dili sila madakpan. —Rowena D. Capistrano/MEL (BANATNEWS)