Drug den gipuhag, menor naluwas
CEBU, Philippines — Lima ang nasikop ug usa ang na-rescue nga minor de edad atol sa pagpuhag sa usa ka drug den diha sa Sitio Mansanitas, Barangay Tisa, ning Dakbayan sa Sugbo niadtong Domingo sa gabii.
Ang nasikop mao ang target sa operasyon nga si Adriano Romarate, alias Edwin, giingong maoy tigmentinar sa maong suyopanan, 55 ; ug ang mga parokyano niini nga sila si Junmae Cuyno, 29, mekaniko; Eliser Atillo, 33, habal-habal driver; Jee Andy Baldapan,30, barbero ug Jocel Pepino, 38, tig-ayo og alahas.
Na- rescue usab ang 17-anyos nga lalaki nga naatlan diha sa maong drug den. Nasakmit sa mga dinakpan ang 19 ka putos nga gidudahang shabu ug uban pang ebidensiya.
Matud pa ni Leia Albiar-Alcantara, tigpamaba sa PDEA-7 dunay nakahatag kanila og impormasyon bahin sa maong suyopanan hinungdan nga duh aka adlaw nila kining gipanid-an.
Sa laing police operations, 198 ka tawo ang nasikop sa kapulisan sa tibuok buwan sa Septiyembre pinaagi sa ilang mga Simultaneous Anti-Criminality Law Enforcement Operations (SACLEO).
Si Police Lieutenant Colonel Wilbert Parilla, Deputy Director for Operations miingon nga 168 ka mga operasyon ang ilang nahimo sa miaging buwan ug ang 42 sa ilang mga dinakpan mga high value individuals, 151 ang street level ug tulo ang bag-o nga pulos nalambigit sa ilegal nga drugas.
Sa maong buwan, dili mominos sa 3.5 kilong shabu ang nasakmit, diin moabot ngadto sa P23 milyones kapin o kulang.
Samtang 231 sab ka mga operasyon ang ilang nahimo batok illegal gambling, diin gatus kapin ang nadakpan kadaghanan sa mga illegal number games. Nakasakmit sab sila og 31 armas. —IBM (BANATNEWS)
- Latest