Drug-free brgys sa siyudad ug probinsya sa Sugbo gi-anunsyo

CEBU, Philippines — Tulo ka barangay sa Dakbayan sa Sugbo ug ubay-ubay sa Cebu Province ang gideklarar nga Drug Free barangay sa Regional Oversight Committee on Barangay Drug Clearing nga gilangkoban sa Philippine Drug Enforcement Agency, Department of Interior and Local Government, Philippine National Police, Department of Health, ug Local Government Unit.

Kini mao ang Barangay Parian, Barangay Sudlon 2, ug Barangay Toong. Matud pa ni Jonah John Rodriguez, pangulo sa Cebu City Office on Substance Abuse Prevention COSAP nga nalipay siya sa maong kalambuan.

Daku og natabang sa maong kalambuan mao ang suporta sa mga opisyal sa siyudad nga gipangulohan ni Mayor Edgardo Labella ug sa chairman sa Committee on Peace and Order nga si Konsehal Phillip Zafra ug lakip usab aktibo nga paglihok sa mga Barangay officials, PDEA ug PNP.

Una nang nadeklarar nga drug cleared mao ang Sudlon 2, Sinsin, Sto. Niño, Sapangdaku.

Samtang gideklarar na usab nga drug cleared ang Barangay Bakilid sa Dakbayan sa Mandaue.

Si Bakilid Barangay Kapitan Roy Lumapas miingon nga ang higpit nilang pagbantay sa mosulod ug mogawas nga mga tawo maoy hinungdan nga nawagtang ang ilegal nga drugas sa ilang dapit.

Samtang sa Cebu Province lakip sa gideklarar nga drug cleared mao ang 3 ka barangay sa  Daanbantayan, 5 sa Bantayan, 2 sa Santa Fe ug 1 sa Malabuyoc.

Apil na usab ang 8 ka barangay sa lungsod sa Madridejos isla sa Bantayan ug kini mao ang barangay Mancilang, Tarong, Bunakan, Malbago, Kaongkod, Maalat, Talangnan ug Poblacion. —Romeo T.  Limpangog, Le Phyllis F. Antojado/MEL (BANATNEWS)