23 ka tawo nga nagpuyo daplin sa sapa sa Dumlog gipabakwit
CEBU, Philippines — Niabot sa 23 ka indibidwal kinsa nagpuyo diha sa daplin sa sapa sa Barangay Dumlog, Dakbayan sa Talisay ang gipabakwit kagahapon sa buntag.
Si Mayor Gerald Anthony “Samsam” Gullas Jr. nakadawat og tawag gikan sa City Disaster Risk Reduction and Management Office (CDRRMO) nga tulo na ka pamilya ang gipabakwit tungod sa pagkan-kan sa yuta nga gitukoran sa mga balay niini gumikan sa pagbunok sa uwan nga niresulta sa pagsaka sa tubig sa sapa.
Kasagaran sa mga namakwit naa kini nagpasilong sa ilang mga kaliwat. Si Gullas nihangyo dili lang sa mga nagpuyo diha sa daplin sa sapa lakip na sa bukirang bahin sa siyudad ug daplin sa dagat nga kong delikado na diha sa ilang pinuy-anan boluntaryo na nga mobakwit ug dili na huwaton nga dunay grabeng mahitabo.
Gimandoan na ni Gullas si Felipa Solana, pangulo sa City Social Welfare and Development (CSWD) nga mohatag og dinaliang tabang alang ngadto sa pamilya nga namakwit.
Padayon sa pag-monitor sila si Alvin Santillana, pangulo sa CDRRMO sa mga lugar nga humok ang yuta diin delikadong modahili, sa kasapaan ug sa daplin sa dagat. BDB (BANATNEWS)
- Latest