PWDs makadawat na sa ilang financial assistance
CEBU, Philippines — Pormal na nga gipahibalo ni Cebu City Mayor Edgardo Labella kagahapon ang skedyul sa pag-apod apod sa financial assistance alang sa mga persons with disability (PWDs).
Matud pa nga madawat nila kini sugod karong September 18 ug house-to-house ang pamaagi sa distribusyon niini aron maseguro ang physical distancing.
Moabot ngadto sa P4, 000 ang dawatonon sa beneficiaries alang sa upat ka buwan nila nga financial assistance nga gilangkoban sa buwan sa Hunyo, Hulyo, Agosto ug Septiyembre.
Suma pa ni Labella nga nipirma na siya og Executive Order No. 143 sa miaging adlaw nga nag-establisar og guidelines alang sa distribusyon sa financial assistance. “Palihug usab sa pag-andam sa inyong ID, ballpen ug pagbutang og tima-ilhan gawas sa inyong balay aron dali kamo nga matultolan sa atong mga disbursement officers. Ayaw kalimot pagsul-ob sa inyong face mask, pag-alcohol ug amping kanunay” suma pa sa mayor.
Usa ka beneficiary sa maong assistance nga si Josh Maglasang ang nahinabi sa Banat News kagahapon ang nipadayag nga dako kaayo kini og tabang sa PWDs alang sa pagpalit sa gimintinar nila nga mga tambal.
“Gamit kaayo ang maong financial assistance aron ipamalit sa among gi-maintain nga tambal, ilabi na karon nga dunay ubang PWD’s ang nawad-an og mga trabaho tungod sa pandemya,” suma pa ni Maglasang.
Suma pa sa head sa Cebu City Public Information Office nga si Razel Cuizon nga ang rehistradong PWD’s sa Siyudad sa Sugbo niabot na og dul-an sa 12, 200. MEL (BANATNEWS)
- Latest
